jump to navigation

Hindi tama at alam mo iyan. ‘Wag ka ng mag maang-maangan. March 13, 2014

Posted by damdamn in damdam shareshare.
add a comment
Nariyan ka na naman sa iyong sulok
Hihikbi na pasaan at nagmumukmok

Nababakbak pa lamang ang nakaraang sugat at heto ka na naman may bago kang aabangan na maghilom. Maglalangib pa yan. Mangangati. Pero ipupusta ko sa iyo, bago dumating ang araw na magtutuklap yan ng kusa, may panibagong sugat ka na namang aabangang gumaling. Gaya ngayon.

Ang ingay mo kagabi. Sabi mo ayaw mo na. Ang tapang mo pa nga. Sumisigaw ka pa na ng “wala kang karapatan na gawin sa akin to”. Pero nung madaling araw, nag sawa ka sa kakaiyak. Ikaw din ang lumapit sa kanya. Ikaw pa umamo at humingi ng tawad.

Para saan at humingi ka ng paumanhin? Patas lang kung tutuusin, nalamangan ka pa nga e. siya, ayun parang wala lang. Ikaw, nalosyang. ‘Di ko makuha bakit ka nag titiis pa riyan sa ganyang sitwasyon. Sabi mo hirap ka na. E ano balak mo niyan? Magsilbi sa kanya at mag bulag-bulagan sa mga pangyayari, sa mga nangyari at sa kinatatakutan mong maaring mangyari.

Kulang ang concealer makeup na itatakip mo diyan. ‘Di ka na naman makaklabas ng bahay ng isang buwan. Magiisip ng bagong idadahilan; sa magulang, kaibigan. Ang husay mo ng magsinungaling para sya ay pagtakpan. Kung may pagalingan lang ng palusot, winner ka na, may award pa.

Mantakin mong lagi kang may handang yelo dahil alam kahit anong araw sya ay mangbabato. Puro latay na naman ang hita mo. Pati likuran mo bugbog sarado. Ang buhok mo nilagas sa kahihila. Nasabunutan ka dahil nag umasang tumakas sa kamay nya. Nagbukol ang inuntog na pader ang nakakita. Pero wala lang sa iyo, sanay ka na?

Sige magsuklay ka ng lagas-lagas mong buhok. Magmuni-muni ka. tatanungin mo sa sarili mo bakit nagkaganito? Tapos iisipin mo na maswerte ka pa nga may tumanggap sa iyo. Huwat?! Tanga ka ba o nag tatanga-tangahan lang? Kasi pakiwari ko baka hinahanap-hanap mo na iyan? Wag ka sana umabot sa puntong hinahanap-hanap mo na ang sakit sa katawan at mga hampasan.

Magkakatoyo ka nyan, sige ka. ‘Pag nakahanap sya ng iba iiwan ka na. iikutin nya ang mesa. Bibitbitin anak nyo at kakasuhan ka pa na hindi ka angkop maging ina. Kasi nabaliw, naloka.

Isipin mo sarili mo. Mahalin mo katawan na pinahiram. Hindi nga sa iyo yan, lalong hindi rin kanya para pasakitan. Babae ka, magpagalang ka naman. Hindi ka nasa mundo para parausan at hambalusin lang.

Sasabihin mo ngayon di naman laging ganito. may mga araw naman na sya ay normal, matino. May sumpong lang sya. Ulitin mo nga yang sinasabi mo. Tamang rason ba yan? Sa tingin mo yan ang gustong marinig na dahilan ng mga tunay na nagmamahal sa iyo? Alam mong di tama. Ikutin pa natin ng isa pang tatlong daan at anim na pung ikot ang mundo. Mali, mali, mali.

‘Wag mo akong sabihan na ‘di ko alam yan. Pinagdaanan ko sa dalawang yugto ng buhay ko at pilit na nililimot. Na nagmahal ako ng tatlong taong inakala ko.. Ah leche! Wag mo na lang tularan.

Hindi na ako naawa sa iyo kung tutuusin. Gusto ko na lang na manduhan ka ng dapat mong gawin. Bakit? Hindi ito ang unang beses. Naka-ilang tagpo na tayong ganito na nag uusap ng patago sa dinaraing mong sakit. Pati ako nag sasawa na at miss ko na ang iyong mga ngiting di ko na tanda kung kailan ang huli. Pero ‘di kita lulubayan na makita mo na hindi iyan ang nararapat. Magalit ka man sa akin at sa kakulitan ko at walang humpay na pag papaalala na babae ka at ina ng iyong anak. Paano ka igagalang ng mundo kung sarili mo di mo makuhang igalang? Mag ayos ka naman. Pumostura gaya ng dati. Magsaya ka sa iyong pagkababae. Pero di ko buhay yan. Sana man lang maisip mo na ikaw ang hari at reyna ng buhay mo. Hindi sya ang didikta at hindi rin ako.

Ang sarap ba ng lasa ng parang kalawang? Gaga, hindi yan ulam, dugo mo na yan. Mula sa putok mong labi ng masampal at humampas sa hamba ng pintuan. Ano pa ba hinihintay mo? Ikaw na ang paglamayan?

Hindi tama at alam mo iyan.
Huwag ka ng mag maang-maangan.

Bente May 1, 2012

Posted by damdamn in damdam shareshare, damdam sulatsulat.
add a comment

20 Things I want to say to Certain People but You Know You Never Will

Sali rin me!

Mula kay Cabron na mula kay Salbahe na mula sa kung kani-kanino pa.

Sa totoo, nahirapan ako. Bukod sa nakakatamad mag isip (kelan ba hindi), madalas naman kasi nassabi ko naman talaga sa kanila gusto kong sabihin kahit makasakit man ako (ehehe)

Pero, sige. OK game!

1. Hindi ko alam paano kita pasasalamatan. Maaring kulang pa ang ginagawa ko ngayon at maaring kapos pa ang mga efforts ko para sa inyo. Salamat, nabigyan natin ang mundo ng pagkakataon na maging ehemplo ng kung ano ang tunay na pagppatawad at pagsisimula. Hindi man tayo nagkasundo nun sa maraming bgay, pero sa lahat ng maling nagawa natin, ang maghiwalay ang pinaka tamang naging desisyon.

2. Pinatawad na kita.

3. Wag mong isipin sana na dahil di na ako masyadong nagkikibo ay dahil naiintindihan kita. Kaya ako walang kibo kasi sawa na ako sa paliwanag mong walang sense.

4. Hindi ako kailan man magiging perpekto. Lalong hindi kailan man ay maibibigay ko ang lahat sa iyo. Pero ang sisiguraduhin ko, magiging makulay ang buhay nating dalawa hanggat nabubuhay pa ako.

5. Salamat. Kung di ka nagkaganun, hindi ako magkakaganito.

6. Hindi mo man sinunod lahat ng sinabi ko, pero yung pinakaimportante ang ginawa mo. Salamat.

7. Sinadya kong suwayin ka, para pamukha sa iyong mali ka at para anihin ng iba yung itinanim kong pag asa.

8. Wala akong plano. Hindi kita inaasahan, kaya di ko alam gagawin ko sa iyo. Wala akong “balak” lalong walang “siguro”. Ang tiyak ako ay “bahala na”

9. Kung kunwaring magkasunog, at naipit ka sa loob at di makalabas, malamang papanoorin lang kita mag panic habang ako kumakain ng popcorn at humihigop ng coke na maginaw sa may kabilang sidewalk.

10. Itigil mo na yan. Kasal ka.

11. Itigil mo na yan. Hindi naman kayo kasal.

12. Mahal mo ba? E ikaw mahal ka ba nya? Ng higit dun sa isa? WEH?! Di nga?! Sampol nga!

13. Salamat at ako’y natauhan. Hindi pala kita minahal, na challenge lang pala ako.

14. Alam ko yang style na yan. Ipapaalam mo sa lahat kung gaano ka kabuting nilalang para purihin ka ng mundo. Ang hindi mo nalalaman, yang mga pinag gagawa mo, dapat lang naman e at walang kapuri-puri dyan. Kaya natutuwa ang ibang tao sa ginagawa mo ay dahil di sila makapaniwala na magagawa mong maging tuwid.

15. Astig ka rin e, ikaw na nangloko at nangtwotime nun, ikaw pa nagsusumiksikan ngayon tapos ako pa sisihin mo sa sitwasyon? Alam natin kung sino ang unang nagkasala at hindi ako ayun.

16. Mabubuting tao naman yung mga kapatid mo, bakit ikaw mapagsamantala? Ampon ka ba o tulog ka lang nung pinapangaralan yung mga utol mo nun?

17. Kinasal ka lang, ang dami mo ng alam sa buhay?! Hanep!

18. Sa totoo lang, hindi paligsahan kung si nanay o si tatay ang mas magaling. Hindi laro ang pagpapalaki ng anak. Walang tanghalang magaganap para sa kampeon ng pahusayan maging magulang.

19. Sa susunod kung makikipag sabayan ka, siguraduhin mong kaya mo. Wag kang pikon at mag tatawag ka pa ng ibang kakampi. Kasi asahan mo, pag tatawanan ka lang namin, pag nakatalikod ka na.

20. Salamat sa paninira mo. Pinagtibay mo lang ako lalo at mas nalaman ko kung sino talaga ang tunay kong mga kaibigan at totoong nagmamalasakit sa akin.

good ‘ol days September 7, 2011

Posted by damdamn in damdam isip-isip, damdam shareshare, damdam sulatsulat, damdam tulatula.
2 comments

Kung tumanda man tayong magkalayo
at di kita makasama
sa bawat yugto,
ng mga saglit ng surpresa
at mahahabang minutong
pinalilipas ng mga luha.

Ang mga pinagsamahang
kahapon lang ay isang dekada na
ang tinagal,
at mga pagbabagong
ginusto at pinagpilitang tanggapin
ng utak at damdamin.

Naririto at nariyan pa rin.
Patuloy mangungulit
at ngingiti sa bawat
ala-alang mapait at malambing
magbago man ang istilo
at saliw ng oras

Asahan mong ‘di lilimutin.
Naghihintay
na isang gabing
kahit sa panaginip,
makasamang muli.
Good times, pre..

Good times..

napurnada kong balentayms February 14, 2009

Posted by damdamn in damdam shareshare.
9 comments

Hindi kami natuloy ng kadate ko ngayong balentayms! BAKIT?

Ganito kasi yun. Tinanong ko sya kung gusto ba nyang lumabas ng sabado, kasi nga balentayms. Sabi nya, sige at san naman daw kami pupunta. Sabi ko, sa dati. Sabi nya sige.

Edi ayus na sana. So ayan, nag paplano pa ako kung saan kami kakain at kung mag sasama ba kami ng iba. Naisip ko ‘wag na nga lang kasi quality time namin yun. Tutal sa sobrang busy ko, bihira na kami makalabas.

BIYERNES:

“Ano, tuloy tayo?”

“sige”

SABADO:

Nag punta ako ng mall ng mga bandang magtatanghalian. Nagpagawa kasi ako ng susi ng kotse(na leche nakita ko rin yung na misplace ko). So given na babae ako at nasa mall, malamang naglibot-libot pa ako. Napansin ko rin kasi lately na palabasa sya, so ayun nag hanap ako ng mga pwede nyang basahin na reading materials na sa tingin ko e magugustuhan nya.

Nagpa carwash ako, kasi sabi nya ayaw daw nya na madumi yung kotse. Di ko na daw napapalinis. Fine. Pinacarwash ko.

After kong magpacarwash, shempre kailangan kong magkikay. Nag pa pedicure ako. Nagsasawa na raw kasi sya sa kulay ng nail polish ko. Palitan ko na daw ng iba at laging ganun na lang daw ang color. So, pinapalitan ko.

Sobrang excited ko nitong araw na ito. As in. Teka, ‘di pa tapos!

Pag balik ko, nakipag kwentuhan muna ako at nabanggit ko na ang daming tao sa mall at medjo may katrapikan na nga. Nakita ko sya, lumabas ng kwarto, hawak yung remote ng tv. Nag smile, tinanong kung ano yung dala ko. Sabi ko gift ko sa kanya sabay abot. Kinuha nya, bumalik sa kwarto, nagpatay ng tv at nagbasa.

Sinundan ko. Tinanong ko sya, tuloy ba kami. Sabi nya ‘wag na lang daw. Kasi daw narinig nya na maraming tao at trapik. Ayaw na daw nyang umalis, mag babasa na lang sya at matutulog. Sabi ko wala masyado kaya. At nagpalusot pa ako! Sabi ba naman sa akin “sabi mo maraming tao kasi valentines!” Tulog na lang tayo pahinga ka na lang.

Napaka buti ng anak ko ano?

Innate nga ata sa mga lalaki ang ganyang ugali. Haynako! Kamusta naman kaming dalawa pag lumaki ‘to?!

9 out of 10 (tagged) February 5, 2009

Posted by damdamn in damdam shareshare, damdam tagtag, damdam tangatanga.
9 comments

dahil sa wala akong masulat lately, eto at nag pa tag ako kay Sherwin.

Mag kwento ng sampung kwento, at ang isa ay kwentong barbero/kutsero. (mula kay badoodles)

9 out of 10

1. Maraming dahilan kung bakit ako tumigil mag drag race. Isa na dito ang napakaraming away na inabot namin nuon sa loob at labas ng team. Isa sa hindi ko makalimutan ay ang pang yayari sa Kalye Industria sa Libis QC.

Nagsimula ang bukasan ng kotse alas-dos pa lang ng madaling araw. Alas-sais na hindi pa sinisimulan ang takbo. At sa wakas sa naisipan nilang humilera na sa starting line ng mga bandang alas -siete. Unang alok nila sa pustahan palit droga at bigay babae. Babae sige payag mga kasama ko, sa droga hindi. Kahit nag dadrag race kami, e mahal pa naman naming buhay namin. Umabot sa 50k ang pusta (more or less, mga ganun sa pagkakatanda ko), sa wakas pera na lang ang napag usapan.

Unang takbo, panalo kami. Pangalawang takbo, hindi counted kasi nauuna bumitaw yung kalaban naming. Umabot sa 5 tries, at nakakapansin na kami na sinusunog na lang ng mga ungas ang clutch ng isat isa. (FYI, importante ang maayos na clutching sa bitaw, hindi pwedeng sunog ito, dahil mag iis-slide lang sya, wlang kuwenta). Sa wakas, bumitaw at panalo rin kami sa second round.

Pero hindi huminto sa tambayan ang mga ungas. Dahan dahan silang nag drive papalapit, sabay ngiti, sabay babay! At dyan nagsimula ang habulan hanggang Kalye Industriya. Sa kakamadali ng mga ulupong, di nila nakita ang isang lubak na malaki, at pumutok ang gulong nito. Huminto sila, huminto rin kami. Lumabas ng sasakyan at shempre yung mga lalaki (which is lahat sila) ayun nakipagrambol na. Ako (na nag iisang babae, na naman) ay nanatili sa labas ng kotse para uhmm, sige na nga aamin na ako; para makigulo rin. Tip: mas okay pa rin ang baseball bat que sa golf club(yeah). Mainam at kasama namin sa tropa ang mga friendships naming mga pulis ng P (bahala ka na kung  pulis ng pasig, paranaque, o pasay yan. Basta di ko sasabihin) na naka off duty para kumarera din. Nahuli silang dumating ng mga 2 mins(kupad kasi ng oto di nakahabol agad). Nagpaputok sila.

Tapos ang gulo. Kanya kanyang alis. Nag text kung saan mag mimeet up. Napagusapan na wag munang mag kita-kita ng 3 linggo. Pero hinunting pa rin namin yung mga ungas after 3 months, nakilala ko rin ang mga ungas. Alam ko bahay ng mga drugista at pusher na yun hanggang ngayon. Isang verbal agreement ang nabuo. Di kami mag tuturo na drugista sila, pero dodoblehin nila ang pusta na tinakbo at pinatalo nila.

2. Marami na akong nalibre ng pamasahe na hindi ko kilala. Ayaw kong na de-delay ang biyahe ng dahil lang sa walang kwentang away. Isang gabi, nakasakay kami sa bus, papauwi na kami galing Baguio, nang nasa Pangasinan na kami, biglang sumigaw ang isang babae sa may likuran habagn nakikipag usap sa kundoktor.

“Dapat walang bayad ang bata!”

“Hindi po pwede, may bayad po talaga ang bata”

“Hindi, ayoko magbigay. Putang ina mo, gahaman kayo”

“Misis, may bayad po talaga ang bata, kung gusto nyo bumaba na lang kayo”

“Sige baba na lang ako”

Huminto ang bus.

“O misis, sige, bumaba na po kayo”

“Walang hiya ka talaga, pababaain nyo nga talaga ako?! E ang dilim dilim dito”

“E pumayag kayo na bumaba na lang e”

“Mga salbahe, palibahasa Muslim ako pababain nyo ako. Ginaganito nyo ako!”

Wag mo akong tanungin paano nasali ang relihiyon nya, dahil hindi ko rin alam. Basta nagkatinginan na lang kami ng kasama ko at umiling.

“Misis kung gusto nyo, may presinto na malapit dito, dun na lang namin kayo ibaba?”

“Putang ina mo, kita mo na ipapapulis nyo pa ako! Mga salbahe kayo”

Hindi ko na kinaya ang usapan. Ayaw kong nakikinig sa nonsense. Una sinayang na nila ang oras namin dahil na delay na kami. Mas mamabutihin ko pang mag eavesdrop sa nag aaway na magshota que sa sa ganito. Hindi ko na matiis kaya sumabat na ako.

“Ako na mag babayad ng pamasahe”

Iniabot ko na lang ang pera sa kunduktor. Nagtaka sya. Ngumiti na lang ako at natulog

3. Alam kong ginagawa lang ng mga security guard ang trabaho nila kaya sila masungit kung minsan pero eto isang kwento na nangyari sa amin ng aking mabuting kaibigan nung ako’y nasa kolehiyo .

Kakatapos lang ng last full show ng pinanood namin nuon, napagisipan naming umupo sa may hagdan para hintayin naman lumabas yung mga kasama naming na iba ang pinanood Tutal, may ibang tao rin naman na nakaupo sa may hagdan. Nakita namin na unti-unting kinausap ni manong-guard-sungit ang mga tao para umalis na at wag umupo sa may hagdan. Pare-pareho kami ng rason; may mga hinihintay pa kami. Pero ang sabi lang ni manong-guard e sa exit na lang daw hintayin.

Nang kami na ang kausap ni manong guard ganito ang nangyari.

“May hinihintay rin kayo? Dun nyo na lang hintayin yan sa exit bawal istambay dito.

“A ganun ho ba? Sige aalis kami pag napaalis nyo yang groupo ng foreigner a yan na nilaktawan nyong sitahin. At oo may hinihintay pa kami na customer nyo”

Umalis na lang sya, palakpak tenga na lang ako.

4. Feb 2004, habang ako ay nag papahinga, pinapatugtog ang Beauty and Madness at nag checheck ng friendster acocunt ko, isang reply ang aking binasa.

“…oo may lyrics sheet pa ako nyan. Punta ka bas a wake ni Miguel?”

Knowing the person who sent me the message, hindi nya kayang magbiro ng ganun. Dali-dali kong kinuha ang cellphone ko at nag tatawag sa mga tao. Hindi pala talaga nila pinaalam sa akin agad. Bagong panganak lang kasi ako nun.

Matalik kong naging kaibigan si Migs nung elem at lalong pinatibay pa ng mga kalokohan at pagsasama namin nung highschool. At nung malaman pa namain na magkakilala ang erpats ko at erpats nya, lalong kaming naging close. Isa sya sa nagturo sa akin mag guitara, at nag tiyaga mag turo sa akin mag billiards(na ayaw ko ng pag aralan dahil naalala ko lang sya). Napakabuting tao nun, hindi rin ako sinukuan sa math. Hindi ko rin sya sinukuan sa econ at history. Hindi sya nakakalimot na paalalahanan ako. Laging nandyan para sumaklolo, tapos tatawanan ako pag kami na lang dalawa kung sakaling may katangahan ako. Bag basted sya, ako taga away sa nag basted sa kanya. Pag ako umiiyak dahil sa lalaki, sya taga dagok sa akin para ipamukha ang katotohanan.

Sabi ko sa kanya nun, kung ikakasal ako, hindi ako kukuha ng maid of honor or brides maid, sya ang best man ko. Pero di na mangyayari yun.

Isang gabi, natagpuan ang si Miguel sa may highway ng Commonwelth Ave. Walang malay. Isang mag asawa ang nag dala sa kanya sa hospital sakay ng isang tri-cycle. Mula sa East Avenue Hospital nailipat pa sya ng magulang nya sa St. Lukes. Pag dating sa St. Lukes, nagkamalay pa sya ng ilang minuto at nakausap pa nya tatay nya. Pag katapos i-declare ng doctor nya na safe na si Miguel, nag seizure ito. At tuluyan na nya kaming inunahan.

Hinanda ko ang aking sarili at pumunta ako sa lamay nya. Kasama ng aming mga kaibigan, binalikan naming ang mga moments naming with him. Wala akong nasabi, hindi ako nakapili ng ikukwento. Sa sobrang lungkot ko, hindi ko nakuhang umiyak.

Ang totoo, hanggang ngayon, hindi pa rin ako nakakaiyak sa nangyari. Hindi ko alam kung bakit. Pakiramdam ko, hanggang ngayon, nandito lang sya.

5. Aaminin ko, maldita ako. Marami rami na ring celebrity at pulitiko ang namalditahan ko dahil hindi ko naman sila kilala at wala kong paki kung sikat sila. Ito ang ilan na natatandaan ko:

Isa na si Dudut Jaworski. Kasagsagan ng kampanya ng eleksyon nun. Hinarangan ng batalyon nya ang isang maliit na daanan at ipinarada ang kanyang malaking Prado at ilang mga sasakyan. Nang ako ay daraan sa gilid ng sasakyan nya, hinarang ako ng body guard nya at sa baba na daw si dudut. EH ANONG PAKI KO! Gusto ko lang naman e umuwi ng bahay at wala akong balak makigulo sa mala karnibal ng pulitika ng Pinas.

Tumaas ang kilay ko at hindi nag salita. Inulit nya ang sinabi nya na sa kabila na lang ako dumaan. Sabi ko na lang e, ” bakit hindi kayo ang pumwetso at pumarada dun para wala kayong hassle dito sa daanan ng tao, di kasi parking space to e.”

Bumaba na ang boss nyang si Dudut, at sinabihan ko sya na kung gusto nyang manalo sa eleksyon, palitan nya body guards nya.

Mukhang di sya nagpalit ng bodyguards. Talo sya kay Eusebio.

Ang yumaong si Rudy Fernandez ay isa sa mga damdam ko na rin. Inaamin kong mali naman kasi kami. Nag shoo-shooting sila nuon sa school namin ng mga bandang alas-sais ng gabi. Hindi naman kami inabisuhan ng mga guro namin na may ganun sa school. So, dahil sa kapilyahan namin at sa dakilang pasaway kami e ayun, wala kaming paki sa shooting nila at dirediretso ang kulitan namin.. Hindi kami napahinto sa ingay.

Nilapitan kami ng crew at sabi wag daw kami maingay dahil nag shoo-shooting. At dahil grabe ang kasalbahian ng isa sa amin, walang epekto ang suway. Tapos si Rudy Fernandez na ang lumapit sa amin. Tinanong kami kung wala pa daw ba kaming mga sundo. Sumagot ako ng magalang na “bakit po?”. Sabi nya kasi nag shoo-shooting daw sila at hindi sila matatapos kung maingay daw kami. At dahil pilosopong bata ako, tinanong ko anong kinalaman ng kung may sundo na ba kami o wala? Kasi pwede naman kaming manahimik hindi nya naman kami kailangan palayasin. Pero magalang ako ng ginawa ko yan(takot akong ma suspend). Sabi nya na lang kung tatahimik daw kami e tatapusin na nila agad ang shooting. Sabi ko na lang, good luck sa acting, baka nasundo na kaming lahat tapos recess na namin bukas e nanjan pa kayo.

(Oo na salbahe na ako. Pero nuon pa yan. Nagbago na ako)

Si Bruce Cabral (nung di pa sya sikat, ahaha friend ko yun e, malamang masusungitan ko talaga minsan),

Camille Prats. Buti pa si John Prats, nakakaintindi ng pila.

Angelica Jones. (disclaimer muna) Sya unang nag taray hindi ako. Nasa bar kami nun, tapos lasing na ata sya, tapos ang ingay nya, tapos muntik na syang mapunta sa mesa namin sa harot nya, umangal yung kasama ko nag isang makatindig balahibong “Ano ba naman yan!?!” (oo sarcastic ako) Tapos nag sorry si Angelica ng pa sarcastic. Nairita ako (as usual). Sabi ko wag na lang syang magsorry, maghubad na lang sya, mas matutuwa pa kami.

Mabait naman talaga ako, wag lang mahihiritan ng mali.

6. Naniniwala ako sa “It’s a small world after all”.

Yung ama ng anak ko ay kabarkada ng aking kabarkada nung college. Sa iisang subdivision sila nakatira at mag kabatch sila sa school. Nang mag college ako nag pep squad ako at dun ko nakilala si Roy na friend ni Pet(ama ng anak ko).

Yung drummer naming dati sa banda, kapatid ng batchmate ko na si Jaimie. Nang mag college kami, si Paulo(na bestfriend ko) nakilala si Tembong(naging drummer namin). Hindi nya alam na magkapatid si Jaimie at Tembong(since birth). Na si Tembong e tropa rin ni Pet sa ibang barkada.

Yung boss kong si Mads, kapitbahay ni Greenpinoy.

Yung bago naming officemate na si Bubbles, dating workmate ni Axel.

Yung kasama ko dito sa office na si Manny, kapatid yung teammate ko sa basketball nung highschool ako. At oo, same school din kami lumaki. At kapitbahay pa nya yung teammate ko sa pep squad nung college.

Yung isa kong workmate na si Marty may college friend na si Paul na naging friend si Kiko(na tropa naming ni Pet) na naging friend din si Sam(na batchmate ko nung highschool). Oo, mag kakateam pa sila sa work.

Yung isa sa naging boyfriend ko si Jon (maraming Jon sa mundo, wag kang mag react) may kababata sila JayR na may kapatid na si Sak. Si Sak sing edad ng bunso kong kapatid na si PB, na naging mag tropa naman sila sa school.

At marami pang iba. Hindi ako mag tataka na baka ikaw e may kakilala rin ako na friend mo.

7. Sa tagong part eng katawan ko, may tattoo ng dragon na may background na mountain. Nakuha ko ang ideya mula sa nilalaro kong Legend of the 5 Rings na card strategy game(parang magic the gathering, magkaiba nga lang gameplay). May quote dun ang paborito kong character na si Mirumoto Hitomi na isang member ng Dragon Clan na “I am like the mountain, alone with my strength. I trust no one, so I never need rely on the strengths of others.I am my own lord, my own servant. I carve my own destiny”. I took me almost forever kung talagang ilalagay ko nga yun sa balat ko.

Sa araw na itnakda na para ilagay ko ang obrang aking napili sa aking balat, halos tulakan pa ang nangyari. Hapon kami ng dumating sa shop ng kaibigan ko na nag tatato. Gabi na ng isalang ako. At totoo pala na dapat nakainom ka! Dahil bwakanang shet! Ang saket!

Kung tutuusin labag sa kalooban ko ang ginawa kong yun. Ngunit gusto ko lang ipaalala sa sarili ko ang mga katangahang ginawa ko nuon sa tuwing makikita ko ang tato na yun.

8. Kung naikwento ko na isa akong patunay ng “it’s a small world” isa rin akong patunay na may nadudulot ang katamaran.

Ilang beses ng sinalba ang buhay ko dahil sa katamaran.

Nag mamaneho ako sa may Marcos Highway ng may bumusina na Isuzu Pick-up sa likod ko at iniilawan ako to go faster. Tinamad akong mag mabilis at lumipat ako sa 3rd lane at pinuna ko na sya. Nang malapit na kami sa Marikina-Katipunan bridge, mula sa pa pabalik na lane, isang blue Toyota Corolla ang nawalan ng break ang sumalubong sa area naming. Sumalpok ang Corolla sa pick-up. Kung di ko sya pina-una, malamang ako ang nadale

Isang gabing madilim sa may Corinthians naman. Galing kaming kapihan malapit sa temple ng tinamad akong mag texting while driving. Tinabi ko ang sasakyan, at tinawagan ang nag text sa akin. Kung dumirediretso ako ng maneho malamang nadamay pa ako sa barilan sa may kanto ng Meralco Ave. at Valle Verde.

Isang araw, again tinamad na naman ako. Pina lipas ko ang oras ng nakatanga ako sa kama at nakabukas ang tv habang nag te-training ang daliri ko sa pagpindot ng buton sa remote control. Dapt umaga pa lang e nasa bangko na ako para mag deposito ng pera. Kaso nga tinamad ako. Ang malupit nun, pati kasama ko dapat sa bangko nahawa na rin sa katamaran ko. Nang sumapit ang gabi at sinapian ako sipag, lumabas ako ng bahay at tumambay sa bahay ng kaibigan ko. Dun namin nabalitaan na naholdap ang bangko na dapat pupuntahan namin na itago na lamang natin sa isang acronym na PNB sa may Cainta.

Pero shempre, mas maraming pangyayari na ang pinahamak ako ng katamaran ko. Hindi ko na iisa-isahin dahil mas mahaba yun(at alam kong ang haba na nitong entry na ito)

9. Isang araw, nang ako ay nag babakasyon sa baguio, inutusan ako ng  ko na umakyat sa attic at icheck kung may naiwan yung huling guest na nagstay dun. Tumawag kasi mula Manila para lang i-confirm kung may naiwang maliit na bag.

Umakyat ako sa attic. Ang unang pinto sa kaliwa ay ang communal na cr para sa mga guest. Ang sunod na pinto ay ang room 6 at room 7 ang katapat nun. Pag akyat ko sa hagdan, bukas ang pinto ng cr. Paglampas ko sa may cr, parang napansin kong may sumunod sa akin na reflection mula sa salamin sa loob. Napabalik ako at tinignan kung may tao sa cr. Wala. Walang tao sa cr.

Di ko na pinansin ang naramdaman. Pumunta na ako sa room 7 dahil dun daw sila nag stay. Kinapa ko ang bulsa ko para kunin ang susi, pero wala ang susi. Naglakad ako pabalik ng hagdan para bumaba, baka kasi naiwan ko lang ang susi, pag dating ko sa may cr banda, nakita ko ang susi ng kwarto na nasa sahig. Kinuha ko ito at nagtaka na bakit di man lang ito kumalansing. Naglakad muli ako papuntang room 7 at sa labas ng pinto, may maliit na bag na parang clutch ang nasa mismong harap ng pinto.

Kayo na bahala mag paliwanag. Iyan na ang pinaka di ko maipaliwanag sa lahat ng nangyari sa akin. Ni hindi ko makuhang ikwento dahil ang daming tumatakbo sa isip ko gaya ng paano na lang napunta yung mga yun dun? Bakit di ko nakita agad ang bag? Paano napunta ang susi dun sa banyo? Bakit ako di natatakot? Ano kaya nag aabang sa akin sa loob kung sakaling binuksan ko ang room 7?

Matapos ang kaganapang iyon, inutusan naman ako na mag tanggal ng puting mantel na ginamit para sa overhead projector ng nag guest sa may appartel room. Pagpasok ko, gaya ng naraapat, sarado na ang mga bintana at nakabukas ang mga pinto ng kwarto. Una kong tinanggal ang pagkaka-kabit sa babang parte. Kumuha ako ng upuan para gawing patungan para matanggal ko ang pagkakadikit ng tela sa pader sa bandang itaas. Nang ako ay kusang kinumutan ng tela.

Walang panggagalingan ang hangin dahil sarado nga ang bintana.

Hindi ko na natapos ang pagtatanggal. Patalikod akong naglakad papunta sa kusina, dahil may short cut dun papuntang loob ng lodge. Hinanap ko lola ko, kinuwento ang mga pangyayari. Sabi na lang nya, wag ko ng ikwento sa iba.

Pero dahil pasaway ng ako nuon pa, tinanong ko ang cook namin na si Mang Vlad(nannagturo sa akin mag luto ng chosuey.. ok off topic.. love ko lang talaga sya. ehehe) At gaya ng sinabi ng lola ko, wag ko na daw sabihin pa sa iba. Pfft.

10. Wala na akong makwento kaya yung mga tameme moments ko. Tutal, kanina lang natameme ako.

Isa sa hindi ko makalimutan na tameme moments ko ay nangyari nung ako ay nasa college pa (hindi long ago yan, wag kang oa)

Sya: Uwi ka na.

damdam: ya

Sya: Ah, hindi ka mag te train?

(fyi: may training kasi kami lagi tuwing hapon)

damdam: uhm, papuntang gym

(ang tanga ng sagot di ba? Huweyt ders mor)

Sya: tara sabay na tayo pumunta ng gym

Damdam: kei

Habang nagmamaneho ako papuntang gym  –

Sya: bakit sabi mo uuwi ka na?

Damdam: wala yun.

Sya: dapat ba di ka pupuntang training

(actually dapat hindi, sinamantala ko na lang ang moments na ganito.. na di naman talaga moments)

damdam: mag tetrain

sya: sabay tayo umuwi later ha

Natapos ang training. Ako si engerts, hinintay nga sya, pero sinabay ko naman yung iba. Binaba ko na sila sa mga sakayan nila ng jeep, pero nagpaiwan sya.

Sya: alam mo na naman kung ano ginagawa ko di ba?

Damdam: err no

Sya: nangliligaw ako, pwede ba?

Damdam: parang kuya lang kita e.

PARANG KUYA LANG KITA?

TANGINA?!

SAN GALING YUN?!

1st year pa lang ako, krass ko na ang ungas na yun. At hindi kuya ang tingin ko sa kanya kahit mas matanda sya sa akin. Ang bobo ko talaga sa confrontation na ganito. Potek.

Kinabukasan, hindi na nya ako pinapansin. Tinawanan na lang ako ng friends ko ng malaman nila ang kwento. Kaya naging private joke na sa amin ang “parang kuya lang kita”

AYAN. Tapos na akong mag kwento.. ang dami kong na kwento sorry nobela.

Now im tagging. Goddess. Axel. Antuken. Cutedanger. Beero. UtakMunggo.

ang nasa likod ng pinilakang tabing January 31, 2009

Posted by damdamn in damdam isip-isip, damdam shareshare.
5 comments

Nakapanood ka na ba ng old movies? Yung palabas na in black and white pa na kadalasan napapanood mo na lang sa MGM channel pag gabi na? Napansin mo ba na ang gaganda ng mga babae dun. Parang walang kapintasan at napaka eleganteng tignan. Mayumi at walang bahid ng latay ng stress. Ang sarap nilang titigan at panooring kumanta o sumayaw. Malamyos ang kilos at tunay na nakabibighani.

Nung bata ako, akala ko, lalaki akong tulad nila (hindi black and white ha). Nangarap maging mabighani at kaaya-aya sa mata. Walang ibang iisipin kundi ang mag suklay ng buhok gamit ang malaking brush at humarap sa higanteng salamin. Mamimili sa loob aparador ng magarang damit at dumalo sa isang engrandeng pagtitipon at isasayaw ako ng maginoo at gwapong lalaki.

Ngunit iba ang realidad sa palabas. Sa realidad, ang pagsusuklay ay bilang na bilang ang hagod, may kaagaw ka pa sa salamin. Hindi mo kailangan mag suot ng magarang damit dahil hindi naman engrade ang pupuntahan dahil mag babanat ka lang naman ng buto at swerte mo na lang kung makasabay mo sa elevator ang krass mo at mapansin nya ang nakagawian mo ng outfit. At pag uwi mo, swerte mo na lang kung hindi mo baon ang stress mula sa pinanggalingan mo.

Pero kung tutuusin mas masaya ang realidad. Ang pag hahanap mo ng ikaliligaya mo hindi ka nakatali sa dalawang oras na gaya ng sa palabas. Buong buhay kang makikipag hulaan sa tadhana at makikipag bolahan sa mga sitwasyong dumadating. Ang kumplikasyon ang tunay na nagbibigay ng kulay sa bawat black and white nating buhay na sinimulan. Habang tumatagal, patingkad ng patingkad at lalong pumupusyaw ang paligid. Gumaganda ka at nagiging mabighani sa paraan ng pag dadala mo ng iyong sarili at sa pagpili ng samu’t-saring karakter na pwedeng pagpilian. Nasa desisyon mo kung balak mong maging maganda sa loob at labas.

Walang script na dapat sundan at kailangang kabisaduhin. Hindi bilang ang kilos mo na dapat sumabay sa tugtugin, pwedeng mag freestyle. Pwedeng pumiyok sa inaawit at tumawa pag nagkamali.

Yun nga lang, ang masarap sa palabas… may take two.

Pero ipupusta ko, kung sakaling gagawing pelikula ang buhay mo, mahihirapan kang pumili ng yugto ng isasa-pelikula, dahil ang totoo nyan bawat yugto nito ay mahalaga sa iyo at hindi pwedeng maikwento ng dalawang oras lamang.

haburdey sa akin January 13, 2009

Posted by damdamn in damdam shareshare.
17 comments

Haburdey sa akin!

Ilang taon na ako? Lampas sa quarter of a century old pero nasa kalendaryo pa

Nawala ako sa bilang ng mga araw, at hindi ko namalayan na January 12 na pala kahapon. Akala ko kasi e 11 pa lang. Kung hindi pa ako binati ng Tita ko na “naks, birthday na nya bukas!” e hindi pa ako mapapalingon sa kalendaryo.

Pero ayus lang. Eton a ata ang pinaka kakaibagng bisperas ng kaarawan ko dahil sa sobrang daming kakaibang pang yayari at mga ginawa namin:

Kung kilala no sya, sya ang tunay na ehemplo ng “better be late than later”. Pero nung Lingo, maaga syang dumating at kaming lahat ang late.

Mula kasi sa bahay ni greenpinoy, kailangan pang maglakad ng malayo para lang makapunta sa pinakamalapit na arcade center. Nandun ang shell station, select at jollibee. At kung kilala nyo naman si Lethalverses, sya ang tunay na ehmplo ng “ano naman kung tamad? At least hindi pagod”. Pero ang laking gulat ko nung inaya ko sya na kami na lang ang bumili ng food at pumayag sya.

  • Tatlong beses akong natalo sa poker.

At hindi ako nakabawi man lang… Not my day to gamble I guess.

  • Muli, ay nag sama sama ang Masantol/Final Four

Na kinabibilangan ng mga nilalang na walang love life laging huli mag siuwian at kung “MASANdal TOLog”. Sobrang na miss ko na mag kakasama kaming apat nila Chroneicon, Lethalveres at M. Inabot ata ng buwan ang huling ganitong pag kakataon.

  • Nag cloud watching ng gabi!

Umakyat kami sa bubong nila M kahit ubod at nuknukan ng ginaw! Humiga at nag pinaandar naming ang aming makukulit na iahinasyon at nag cloud watching sa kabilugan ng buwan.

  • Nag feeling rakista! \m/

Nag show kami sa mga estudyante dun sa tapat ng bahay nila M. Nag sasayaw, kanta, at magic at nanguto ng mga estudyante. Namiss ko tuloy mag perform for a crowd. Sana nandun kayo at napanood nyo kalokohan naming

  • Nag almusal ng may kasama

Napaka sarap ang uminom ng kape sa isang bahay na may kasabay ka. Makipag hati sa cinnamon roll with people you enjoy being with.

Isang taon na naman ang lumipas, at nais kong magpasalamat na huwaw! Buhay pa ako! Kahit na nahihirapan na akong magpapayat, kahit na ang daming bagay na ang nakakalimutan ko(ano nga ulit sunod kong sasabihin? Uhmm.. ayun!), kahit napapadalas ang instances na nag kakasakit ako, kahit hirap na akong tumakbo, at lagi na lang akong tulog pag idle ako, at kahit hindi ako naging rakstar, Whoohoo!!! Eto buhay pa rin! Swerte ko at malas ng mga may ayaw, belat!

Salamat sa mga bumati ng advance at bumati ng mismong alas dose ng gabi. Mga nag send ng messages over YM (nag online kahit may trabaho at nag leave ng offline messages), nag plurk (at nag pahayag ng mga pagmamahal nila sa akin.. ok nakangiti pa rin ako), nag send ng text messages, at tumawag.

XOXO!!! Mehel kew keyew!!!

TAG: 10 things that makes me smile December 3, 2008

Posted by damdamn in damdam shareshare, damdam tagtag.
4 comments

Mantakin mong dahil sa hindi ko ma update ang blogroll ko ay na-tag pala ako ni ayz.

Kailangan lang e magbigay ng sampung bagay na makakapagpangiti sa akin. At napaka hirap nito para sa akin, dahil sobrang babaw ko lang na tao, at mabilis lang akong pangitiin. So, ang gagawin ko e kung ano na lang maisip ko right this moment. Random, not in order ‘to.

1. Certain smell, song and climate

May specific na amoy, kanta at panahon na nagpapabalik sa akin sa nakalipas. Very nostalgic. at for sure mapapangiti ako ng sobra.

2. Sinigang na baboy na luto ni ermats

Kahit anong pagod at puyat at hang over pa yan, tanggal lahat ng iyan sa luto ni mama.

3. Ang malambing kong anak lalo na mabango sya at hindi makulit

I admit, hindi sa lahat ng pag kakataon e nakakatuwa si santi dahil grabe kulit ng batang yun. Oo na sige, may pinag manahan, blah blah blah. Pero ang mga biglaang lambing ni santi na “wala lang” talaga ang nakakapag pa ayyyy sa akin. Parang pusa lang yun, tulad ko, ayaw nung ng masyadong nilalambing, gusto nun sya ang nauuna manglambing. At yung pag natutulog sya, parang ang bait bait. Tapos ang sarap asarin! Sarap simsimin ng amoy.

4. Moments after kong kagatin si Pb.

Ang sarap nyang awayin e… ahahaha!

5. out of the blue text message or chat just to tell me sweet nothings

Yung mga biglaang message like “uyy na miss kita all of a sudden” or “naalala kita, dahil may pinapanood ako ngayon” or messages just to make me feel secured and calm and telling me he loves me (uyy!). Tsk, napaka sarap ng ngiti ko nun, at wala akong paki kahit bola sya. At least nag effort! (Tapos globe pa ako, smart sya.. ohohoy! clue o!)

6. Ayala Ave, Makati on a Sunday morning

Lalo na kung napaka ganda ng sikat ng araw. Ang sarap mag lakad lakad along Ayala ave or mag drive ng ganitong moment. Tapos uupo ka sa isang waiting area. Petix lang at uupo. Mag aabang sa wala.

7. Pera sa bulsa na akala mo walang laman

Parang Eureka! ang dating everytime nangyayari sa akin ‘to. “May pang bisyo na ako!”

8. 13 degree celsius cold beer

Do i have to elaborate? by the way 13 degrees ang ideal temp ng beer para delicioso!

9.  Favorite pictures ng mga mahal ko sa buhay at moments na inaasar ko sila pero di sila napipikon.

Friends pics and shempre picture ng aking epel ef the eye (na hindi ko pa rin i di-disclose kung sino). Muli, nag papasalamat ako sa mga friends ko na di napipikon sa aking katarayan (oo  na, inaamin ko ng mataray ako, pero alam nyo naman na carinyong brutal lang ako) i love you all.

10. and… Waking up right next to the person you really love. Never fails.

*now im tagging.. uhm.. popoy, pb, ruthan(hoy tama na hiatus!), antuken, at  rj.

binabantaan kita, kapag ako sinaktan mo. December 2, 2008

Posted by damdamn in damdam shareshare.
6 comments

Psst hoy babae… oo ikaw nga. Yung napakahilig mang hampas at manundot ng tagiliran? Frustrated holdaper ka ba at gustong gusto mong nanggrigripo? Bakit kala mo kung makahampas ka e close tayo? Di tayo close uulitin ko ha, HINDI TAYO CLOSE, at wala akong panahon makipagharutan sa iyo.

Hindi ko naman kasi maintindihan sa iyo kung bakit sa tuwing natutuwa ka sa kwento ko e kung makahampas ka e parang nasa pugad tayo ng lamok. Ok fine, malaki braso ko, pero naman, hindi ‘to palu-palo na pwede ka rin maki hampas pag tuwang tuwa ka na. maiintindihan ko pa kung kumakanta ako ng hit me baby one more time para hampasin mo ako ng paulit ulit.

Yung buhok ko, hindi laruan yan. Kung nakita mong “nakaayos” wag kang epal na guguluhin mo sya, at pag hindi kita pinansin e guguluhin mo pa lalo. At pag sinita ka e sasabihan mo ako na ang ganda ngbuhok ko sa tono na gigil ka na parang gusto mo akong kalbuhin.

May oras sa biruan at may oras sa mas biruan. Paano mo magegets ang alin sa alin. Problema mo na yan. Matuto kang tumancha. Eto tip, pag hindi kita nilalapitan, ibig sabihin wala akong pakialam sa iyo at wala ako sa mood makipag biruan. So therefore! dahil di naman ako lumalapit sa iyo, pwes now you know na wala akong panahon makipag biruan sa iyo.

At ilang beses ko bang sasabihin na hindi ako tibo, at wala akong balak maging.

Pero di ako galit sa iyo. Baka kasi hampasin mo na naman ako e at di ako makapgpigil e sapakin kita.

*note: hindi iisang tao ang tinutukoy ko dito. So ang tamaan sapul na lang. Yung lurker dyan sa tabi tabi  peace tayo. Wag akong hahampasin, makakatikim ka ng stunner, people’s elbow at tomb stone, sige. This time tototohanin ko na.

my tertinth month pay dilemma November 13, 2008

Posted by damdamn in damdam shareshare.
8 comments

May kakaiba akong sakit pag papalapit na ang tertinth month pay:

Hindi pa dumarating, o sabihin nating isang buwan pa bago matanggap, ubos na sya sa diwa ko at nalustay ko ng lahat. Naisip ko na kung anong mga regalo. Saan ako kakain. Magkano willing akong pa hold up sa nanay ko. Pati up to what extent ko kayang mag pauto sa utol ko a anak ko para maging bangko sentral nila.

Pero!

Kapag nagdiriwang na ang lahat ng tao sa opisina at napawi ang PMS ng boss nila dahil pumasok na pala sa account nyo ang tertinth month pay, e parang ayaw ko ng mag withdraw. Parang nanghihinayang akong bawasan sya. Natatakot akong gastusin sya. Ayaw ko ng gumastos. Ang sarap tignan e!

At mamaya lamang. Masasaksihan ang isa sa pinaka maligayang araw dito sa opisina. Walang nakasimangot at buraot. Dahil ire-release na ang bonggang tertinth month. At tititigan ko na lang muna sya dun. (parang picture lang ni ano… ni…)

Kaya mamaya, may problema ako.